Scholes tvö ár í viðbót

Paul Scholes, miðjumaður Manchester United, segist reikna með því að leggja skóna á hilluna eftir tvö ár. Scholes er orðinn 33 ára en hann hefur allan sinn feril leikið með United.

„Ég á eitt ár eftir af samningi mínum og vonandi fæ ég annað í viðbót. Þetta veltur samt allt á því hvernig standið á manni verður og hvernig maður er að spila," sagði Scholes.

Scholes hefur á sínum ferli alltaf haldið lífi sínu algjörlega frá fjölmiðlum og veitt ótrúlega fá viðtöl. „Ég hlakka ekki til að hætta en það verður gott að losna frá öllu þessu sem fylgir því að vera í minni stöðu," sagði Scholes.

„Fólk vill vita um allt sem þú ert að gera og maður fær varla frið. Ég mun sakna þess að spila fótbolta en ég mun ekki sakna neins annars sem fylgir því að vera atvinnumaður hjá stórliði."

Scholes hefur átt frábæran feril og á stóran þátt í afrekum Manchester United á síðasta tímabili. Hann skoraði þá meðal annars eftirminnilegt mark gegn Barcelona í undanúrslitum Meistaradeildarinnar og skaut United í úrslitaleikinn.