Frjálslyndir vilja tengja krónuna við evru

Guðjón Arnar Kristjánsson, formaður Frjálslynda flokksins, segir að Björn Bjarnason dómsmálaráðherra hafi ekki trú á íslensku krónunni. Það séu helstu tíðindin sem megi lesa út úr hugmyndum sem hann reifaði á vefsíðu sinni um að taka upp evru á grundvelli EES samningsins.

„En það sem er merkilegast við þetta er að í þessum orðum felst ákveðin viðurkenning sitjandi ráðherra í ríkisstjórn Íslands og mikils áhrifa manns í Sjálfstæðisflokknum á því að hann hafi ekki trú á íslensku krónunni. Það eru náttúrulega aðlal tíðindin í þessu," segir Guðjón Arnar á vefsíðu Frjálslynda flokksins.

Guðjón segir að Frjálslyndi flokkurinn sé alls ekki á móti því að tengja krónuna við annan gjaldmiðil. Þvert á móti hafi flokkurinn talað fyrir því í síðustu kosningum. Hins vegar verði ekki skipt um gjaldmiðil í 13% verðbólgu.