Góð veiði þrátt fyrir slæm veðurskilyrði

Eftirspurn eftir veiðileyfum hefur minnkað vegna slæms efnahagsástands, að sögn Haraldar Eiríkssonar, hjá Stangveiðifélagi Reykjavíkur. Hann segir þó að stangveiði sé sívaxandi sport, enda sé félagatalið að nálgast 4000. „Þetta þarf ekki að vera dýrt sport, en það getur verið það," segir hann í samtali við Vísi.

Haraldur segir að veiðin hafi gengið vel, sérstaklega síðustu daga. „Það er eiginlega alveg sama hvert litið er. Til dæmis er mjög góð veiði í Norðurá í Borgarfirði, í Soginu, í Hvítá í Borgarfirði og svo Gljúfurá í Borgarfirði. Þar var síðasta holl með 25 laxa, sem er met að ég held," segir Haraldur. Hann segir jafnframt að Krossá á Skarðsströnd sé mjög vinsæl, sem og bæjarárnar.

Haraldur segir að veiðin hafi gengið sérstaklega vel þegar tekið sé tillit til þess að veðráttan hafi verið óhagstæð fyrir veiðar þar til um síðustu helgi. „Við erum að veiða fram yfir miðjan september. Það er misjafnt eftir því hvar á landinu um er að ræða," segir Haraldur.