Hefur ekkert heyrt frá dómsmálaráðuneytinu

Katrín Theódórsdóttir, lögfræðingur Paul Ramses hefur ekki enn heyrt neitt frá dómsmálaráðuneytinu. Hún lagði inn kæru síðastliðinn miðvikudag vegna ákvörðunar Útlendingastofnunar um að taka hælisbeiðni Ramsesar ekki til umfjöllunar hér á landi heldur senda hann til Ítalíu á grundvelli Dyflinnar-samningsins.

„Við vonum bara að þau hjá dómsmálaráðuneytinu fari að herða róðurinn. Paul Ramses bíður auðvitað bara þarna úti á meðan konan hans og barn er hér," segir Katrín.

Aðalkrafan í kærunni felst í því að ákvörðun Útlendingastofnunar verði dæmd ógild vegna þess hvernig staðið var að ákvörðuninni og að hælisbeiðnin verði tekin fyrir hérna á Íslandi.

Paul Ramses var sendur úr landi um morguninn þann 3 júli síðastliðinn og er því búin að dvelja nú í tæpar tvær vikur á Ítalíu. Honum var tilkynnt ákvörðun Útlendingastofnunar kvöldið áður en hann var sendur úr landi.