Verklagsreglur ekki sem skyldi hjá íslenskum friðargæsluliðum

Frumábyrgð á árásinni á íslenska friðargæsluliða í Kabúl í október 2004

liggur hjá þeim sem skipulögðu og gerðu árásina segir í álitsgerð sem samin var fyrir utanríkisráðuneytið.

Árásin sem um ræðir var sjálfsmorðsárás. Tilræðismaður varpaði þrem handsprengjum að friðargæsluliðum sem voru í og við teppaverslun í hinu svokallaða Kjúklingastræti.

Þrettán ára gömul stúlka og bandarísk kona fórust í árásinni sem og tilræðismaðurinn. Fjórir íslensku friðargæsluliðanna særðust sem og nokkrir Afganir.

Það voru hæstaréttardómararnir Guðrún Erlendsdóttir og Haraldur Henrýsson sem unnu álitsgerðina fyrir ráðuneytið.

Þar segir meðal annars að ekkert bendi til annars en að öryggisgæsla í ferðinni hafi verið óaðfinnanleg og að íslensku friðargæsluliðarnir hafi í einu og öllu brugðist rétt við.

Ingibjörg Sólrún Gísladóttir utanríkisráðherra sagði á fundi með fréttamönnum að með þessari skýrslu væri ekki verið að leita að sökudólgum en ýmislegt hefði komið fram sem hægt væri að læra af.

Til dæmis hafi það sýnt sig að verklagsreglur og boðleiðir bæði hjá ráðuneytinu og öðrum hafi ekki verið sem skildi. Til dæmis hafi friðargæsluliðar fengið misvísandi skilaboð frá yfirmönnum.

Þannig sagði erlendur yfirmaður á Kabúl flugvelli íslensku friðargæsluliðunum að gott væri að vera á ferðinni um Kabúl og vera þannig sýnilegar gagnvart íbúum.

Hins vegar taldi íslenskur yfirmaður öryggismála hjá friðargæslunni ferðin óráðlega.

Þar sem að niðurstaða álitsgerðarinnar er sú að frumábyrgð sé hjá árásaramönnum munu íslensk stjórnvöld ekki greiða neinar bætur fyrir tjón sem erlendir aðilar urðu fyrir.

Hvað Íslendingana varðar þá hefur tryggingarmálum við einn verið lokið. Þrír eru enn óbættir.

Ingibjörg Sólrún Gísladóttir sagði að það væri óþolandi að ekki væri búið að ganga frá þeim málum eftir fjögur ár og að ráðuneytið muni aðstoða þremenningana við að leiða málið til lykta.