Borgin vill leysa vanda Fjölskylduhjálparinnar

Reykjavíkurborg vinnur að lausn á rekstrarvanda Fjölskylduhjálparinnar og hyggst boða forsvarsmann hennar á sinn fund, að sögn Stellu Víðisdóttur, sviðsstjóra Velferðarsviðs.

Fjölskylduhjálpin leigir húsnæði við Eskihlíð af borginni. DV greindi frá því í morgun að samtökin hefðu ekki getað staðið í greiðsluskilum vegna húsaleigunnar og því væri stutt í að þeim yrði úthýst úr húsinu.

„Ég var að ræða þetta mál við framkvæmdasvið borgarinnar og við ætlum okkur að leysa það í samvinnu við forsvarsmann fjölskylduhjálparinnar," segir Stella í samtali við Vísi.

Stella segir að mjög mörg félagasamtök óski eftir styrk frá Velferðarsviði en því miður sé ekki hægt að verða við öllum styrkbeiðnum. „Forgangsröðunin hefur verið þannig að þeir fengu ekki styrk síðast," segir Stella um afgreiðslu á styrkbeiðni Fjölskylduhjálparinnar.

Stella segir að skammt sé í að styrkbeiðnir verði auglýstar fyrir næsta ár og umsóknum eigi að skila fyrir 1. október.