Vonar að mál Ramses verði afgreitt sem fyrst

Katrín Theódórsdóttir, lögfræðingur Paul Ramses hefur ekkert heyrt frá dómsmálaráðuneytinu eftir að hafa lagt inn kæru á miðvikudaginn. Hún vonar að mál Ramses verði afgreitt sem fyrst vegna sérstaka aðstæðna í því. Hún segist ekki þekkja nein fordæmi fyrir því að semja við Útlendingastofnun eins og Atli Gíslason, þingmaður Vinstri hreyfingarinnar- Græns framboðs, stakk upp á.

„Þetta mál er þess eðlis að það þarfnast ekki mikillar rannsóknar vegna þess að á þessu stigi er eingöngu verið að ákveða hvort við séum tilbúin að taka þessa umsókn fyrir hérna heima á grundvelli mannúðarsjónarmiða, vegna barns og konu hérna heima og tengsl Ramses við Íslands,"segir Katrín.

Að sögn Katrínar byggist það því fyrst og fremst á viljanum hjá ráðherra hvenær niðurstaða komi varðandi kæruna og á því hvernig hann meti málið.

„Rannsóknararvinnan hefst svo fyrst hjá Útlendingastofnun, rannsókn á því hvort að hann sé í þessari þörf fyrir vernd sem hann segist vera í og allt bendir til að hann sé í. Það er ekki verið að fara fram á meira en að málið verði tekið fyrir hérna heima og fyrir það þarf enga rannsókn. Aðalkrafan felst náttúrulega í því að fyrri ákvörðun verði dæmd ógild vegna þess hvernig staðið var að ákvörðuninni."

Um uppástungu Atla Gíslasonar í viðtali við Vísi á þriðjudaginn að allir aðilar málsins setjist niður og semji segir Katrín „Ég þekki engin fordæmi fyrir því að semja við Útlendingastofnun. Hinn eðlilegi farvegur er kæra til æðra stjórnvalds sem í þessu tilviki er dómsmálaráðherra."