Lúðvík Geirsson: Erum ekki að skáka starfsfólki til

Lúðvík Geirsson, bæjarstjóri Hafnarfjarðar, segir engan grundvöll fyrir gagnrýni Rósu Guðbjartsdóttur, bæjarfulltrúa Sjálfstæðisflokksins, sem ritar um „sjálfsgagnrýni Samfylkingar" í Fréttablaðið í dag.

„Hún er að blanda tvennu ólíku saman," útskýrir Lúðvík.

Í grein sinni skrifar Rósa um að gagnrýni oddvita Samfylkingarinnar í Kópavogi á mannaráðningar meirihlutans í stjórnunarstöður að undanförnu gæti allt eins beinst að hennar eigin flokkssystkinum í Hafnarfirði.

Segir Rósa meðal annars: „Samfylkingarfólki finnst ófaglega staðið að ráðningu í stjórnunarstöður í Kópavogi því þær hafi ekki verið auglýstar heldur fallið í skaut eldri starfsmanna í bæjarfélaginu. Fullyrt er að slíkar aðferðir þekkist ekki í öðrum sveitarfélögum. Það er misskilningur. Meirihluti Samfylkingarinnar í Hafnarfirði hefur einmitt talsvert notað þessa aðferð þegar ráðið hefur verið í stjórnunarstöður, á undanförnum árum og misserum."

Nefnir Rósa nokkur dæmi um ráðningar meirihlutans í stjórnsýslu bæjarins þar sem hún telur að ekki hafi verið rétt að máli staðið.

Einfaldlega verið að breyta starfsheitum

„Rósa er að tala almennt um tilfærslur í starfi en þau dæmi sem hún nefnir hér hjá okkur eru í flestum tilvikum breytingar á störfum og starfssviðum, og það er annar hlutur. Það eru skýrar heimildir í kjarasamningum starfsmanna um rétt til slíkra breytinga þegar er verið að framkvæma stjórnsýslubreytinga eða einhverjar starfskipulagsbreytingar," segir Lúðvík.

Lúðvík bætir við að í tilfellum Hafnarfjarðarbæjar hafi ekki verið að færa fólk til í algjörlega ný störf, eins og gert var í Kópavogsbæ.

„Í Kópavogi voru skilgreindar nýjar stöður sem fólki var skákað til í. Í okkar tilfellum var einfaldlega verið að breyta starfsheitum og þróa störfin."