Manns leitað í Esjuhlíðum

Björgunarsveitir Slysavarnafélagsins Landsbjargar leita nú karlmanns sem týndur er í Esjunni. Maðurinn, sem var á göngu í fjallinu, lenti í þoku og hefur verið í villu síðan um klukkan hálf sex í dag. Þetta kemur fram í fréttatilkynningu frá Slysavarnafélaginu Landsbjörg.

Maðurinn er í símasambandi og hringdi eftir hjálp klukkan rúmlega átta í kvöld. Um 20 björgunarsveitarmenn hafa hafið leit og fleiri eru á leiðinni. Allt kapp er lagt á að finna manninn fyrir myrkur enda kalt í þessari hæð þegar nóttin skellur á.

,,Eins og fyrr segir er maðurinn í símasambandi og heldur kyrru fyrir þar sem hann er þar til björgunarsveitarmenn finna hann. Það eru hárrétt viðbrögð því hættulegar klettabrúnir eru víða í toppi Esjunnar," segir í tilkynningunni.