Tilbúinn að ræða flutning lögreglu á Höfn yfir í Suðurkjördæmi

Björn Bjarnason dómsmálaráðherra er tilbúinn að ræða þá hugmynd að lögreglan á Höfn í Hornafirði verði fremur hluti af lögregluliði Suðurlands en Austurlands ef það er vilji heimamanna og lögreglu að tengjast lögreglustjóra innan sama kjördæmis. Þetta kemur fram í svari hans við fyrirspurn Bjarna Harðarsonar, þingmanns Framsóknarflokksins, um löggæslu á Austurlandi.

Lögreglan á Höfn heyrir nú undir lögregluna á Eskifirði og spurði Bjarni hvort ráðherra teldi hvort markmið um sparnað og hagræðingu hefðu náðst með sameiningu lögregluembætta þvert yfir kjördæmamörk á Austurlandi. Ráðherra svaraði því til að sameining lögregluembætta í fyrra hafi ekki lotið að sparnaði eða hagræðingu. Hvorki hafi verið gert ráð fyrir hækkun né lækkun útgjalda vegna breytingarinnar.

Bjarni spurði einnig hvort ráðherra teldi stöðu löggæslumála í sveitarfélaginu Hornafirði viðunandi eftir breytingarnar. Fram kom í svari Björns Bjarnasonar að með stækkun umdæma hafi liðsheild lögreglu orðið stærri og þar með styrkari. Fjarlægð frá lögreglustjóra réði ekki styrk lögregluliðs heldur skipulag þess, umgjörð og mannafli. Það ætti við um löggæslu í Sveitarfélaginu Hornafirði og væri lögregluliðið þar vel í stakk búið til að takast á við verkefni sín.

„Að mati ráðherra er staða lögreglumála í sveitarfélaginu Hornafirði viðunandi, þótt alltaf megi gera betur. Til dæmis hefur það verið orðað við ráðherra að eðlilegra sé að lögregla í sveitarfélaginu sé hluti af liði á Suðurlandi en Austurlandi, án þess að í því felist nokkur gagnrýni á lögreglustjórnina á Eskifirði, sem er til fyrirmyndar. Sé það vilji heimamanna og lögreglu að tengjast lögreglustjóra innan sama kjördæmis er ráðherra tilbúinn að ræða þá hugmynd. Er eðlilegt að gera það á grundvelli úttektarskýrslu um reynsluna af nýskipan lögreglumála, sem birt verður á næstunni," segir einnig í svari ráðherra.