Bitist um skammstöfunina HRFÍ

Deilan um skammstöfunina HRFÍ virðist vera að magnast. Á dögunum sagði Vísir frá því að Hundaræktarfélagið Íshundar hefði skráð skammstöfunina HRFÍ til Einkaleyfastofu. Formaður Hundaræktarfélags Íslands, sem stofnsett var árið 1969 og hefur alla tíð notast við téða skammstöfun, hafði þá ekki heyrt af málinu en sagði að um blekkingarleik af hálfu Íshunda væri að ræða ef rétt væri.

Nú hefur stjórn HRFÍ (Hundaræktarfélags Íslands, það er að segja,) falið lögfræðingi sínum að sjá til þess að „einkaleyfisskráning Hundaræktunarfélagsins Íshunda á skammstöfuninni HRFÍ verði afturkölluð eða felld niður," eins og segir í tilkynningu.

Einnig segir að mat stjórnar sé að Einkaleyfastofan hafi gert mistök með því að skrá HRFÍ sem einkaleyfi hjá Íshundum og á það bent að skammstöfunin hafi verið notuð frá stofnun þess.

„Hundaræktarfélag Íslands á lénið hrfi.is og hrfí.is. Félagið hefur merkt fatnað sinn með þessari skammstöfun. Notað skammstöfunina í merkjum á vegum félagsins. Auk þess haldið bæði opinberar íslenskar og alþjóðlegar sýningar undir merkjum HRFÍ.“

„Svo er fyrir að þakka þrotlausri baráttu og þrautseigju ótalinna félagsmanna að HRFÍ nýtur orðið trausts og virðingar bæði hér á Íslandi og erlendis. Það er öllum ljóst sem eitthvað þekkja til hundahalds og hundaræktunar á Íslandi að HRFÍ stendur fyrir HUNDARÆKTARFÉLAG ÍSLANDS,“ segir einnig í tilkynningunni.

„Þeir aðilar sem að Hundaræktunarfélaginu Íshundum standa vita fyrir hvað HRFÍ stendur og því ef til vill eðlilegt að þeir vilji baða sig í þeim ljóma sem fylgir því að tilheyra HRFÍ. Það verður þó að gerast með öðrum hætti en þessum," segir að lokum en undir bréfið ritar fyrir hönd stjórnar HRFÍ, Gunnlaugur Valtýsson.