Ekki útlit fyrir að lífeyrir skerðist hjá Lífeyrissjóði verslunarmanna

Útlit er fyrir að ekki þurfi að lækka lífeyri og önnur réttindi hjá Lífeyrissjóði verslunarmanna um næstu áramót samkvæmt tryggingafræðilegri úttekt sem sjóðurinn hefur látið gera.

Á heimasíðu sjóðsins kemur fram að ráðist hafi verið í úttektina vegna fjármálakreppunnar en hún leiddi til þess að eignir í verðbréfasafni lífeyrissjóðsins minnkuðu. Niðurstöðurr úttektarinnar sýna að staða sjóðsins verði neikvæð um tæp tíu prósent um næstu áramót. Lög um skyldutryggingu lífeyrisréttinda og starfsemi lífeyrissjóða kveða á um að ef munur eignarliða og skuldbindinga fer umfram 10 prósent verði að grípa til ráðstafana.

„Reynist niðurstaða ársins í samræmi við áætlun tryggingafræðingsins þarf ekki að koma til lækkunar lífeyris og réttinda um næstu áramót. Frá 1997 hafa lífeyrisréttindi verið hækkuð um 21,1% umfram verðlagsbreytingar," segir á heimasíðunni.