Fyrsti áfangi samgöngumiðstöðvar verði tilbúinn í lok næsta árs

Ólafur F. Magnússon borgarstjóri vonast til þess að fyrsti hluti samgöngumiðstöðvar á Reykjavíkurflugvelli verði tilbúinn í lok næsta árs. Hann situr nú á fundi með Kristjáni Möller samgönguráðherra um málið.

Kristján L. Möller samgönguráðherra kom til fundarins fyrir hádegi ásamt Róbert Marshall, aðstoðarmanni sínum, og Ragnhildi Hjaltadóttur ráðuneytisstjóra í samgönguráðuneytinu. Þar hugðist hann funda með Ólafi F. Magnússyni borgarstjóra og aðstoðarkonu hans, Ólöfu Guðnýju Valdimarsdóttur, um aðstöðumál innanlandsflugs á Reykjavíkurflugvelli.

Ólafur sagði fyrir fundinn að ætlunin væri að ræða samgöngumiðstöð í Vatnsmýrinni. Honum væri annt um að uppbygging hæfist sem fyrst við hana og hann vonaðist til að fyrsti áfangi hennar yrði tilbúinn í lok næsta árs. Sagði hann málefni samgöngumiðstöðvarinnar hafa dregist of mikið og það væri öllum til góðs, bæði borgarbúum og landsbyggðinni, að hefjast handa í málinu.

Aðspurður um það hvort til stæði að kynna bráðabirgðalausn á aðstöðumálum á vellinum sagði Ólafur að það kæmi í ljós eftir fundinn.