Fangar yfirheyrðir vegna andlátstilkynningar

Lögreglumaður frá rannsóknardeild lögreglunnar á Selfossi er nú staddur í fangelsinu á Litla-Hrauni til að taka skýrslur af föngum vegna falskrar dánartilkynningar í Morgunblaðinu í gær.

Búist er við að rannsókn málsins ljúki í dag eða á morgun en hún beinist meðal annars að því með hvaða hætti dánartilkynningin var pöntuð og hvort fleiri en þeir tveir sem grunaðir eru um að standa að henni, tengist málinu.

Í Morgunblaðinu í gær var sagt frá andláti Hákons Rúnars Jónssonar og hann sagður hafa látist eftir langvarandi veikindi og er þeim sem vilja minnast hans bent á reikningingsnúmer. Þetta kom forsvarsmönnum Litla-Hrauns í opna skjöldu enda amar ekkert að Hákoni. Þegar nánar var að gáð kom svo í ljós að reikningurinn sem gefinn var upp í auglýsingu er í eigu annars fanga, Sigurbjörns Adams Baldvinssonar.