Miklar áhyggjur af stöðu kvikmyndagerðar

Þórhallur Gunnarsson segir að RÚV muni kappkosta við að halda dampi í framleiðslu á leiknu innlendu efni. Fréttablaðið greindi frá því í gær að fyrirtæki Björgólfs Guðmundssonar, Ólafsfell, gæti ekki staðið við skuldbindingar sínar gagnvart framleiðslufyrirtækinu Pegasus. Hafði Ólafsfell skuldbundið sig til að styrkja spennuþáttaröðina Hamarinn um 25 milljónir samkvæmt samkomulagi fyrirtækisins og RÚV en hafði einungis greitt átta.

Fjölmargir kvikmyndagerðarmenn höfðu sett sig í samband við Þórhall í gær og lýst yfir áhyggjum sínum af stöðu mála. „Við erum með fjölmörg verkefni í vinnslu, svo þarf bara að athuga hvort okkur takist að fjármagna það.

Við eins og aðrir vitum ekkert í hvaða stöðu við erum. Það eru einfaldlega svo margir póstar sem eru ófyrirséðir, meðal annars þátttaka annarra erlendra sjónvarpsstöðva, sjóða og fé af hinum frjálsa markaði."

Þórhallur segir að RÚV eins og önnur fyrirtæki verði að fara í aðhaldsaðgerðir. Fram undan séu tveir af vinsælustu dagskrárliðum Sjónvarpsins; Gettu betur og Eurovision. Báðum þessum viðburðum var gert hátt undir höfði í fyrra en verða væntanlega smærri í sniðum nú.

Þórhallur útilokar ekki að færa báðar keppnirnar inn í sjónvarpshúsið sjálft. „Slík ráðstöfun ætti ekkert að rýra skemmtanagildi þáttanna og sjónvarpsáhorfendur ættu svo sem ekki að finna mikinn mun. En þetta hefði eðlilega þau áhrif að umstangið yrði minna og færri áhorfendur kæmust að."- fgg