Grinch er eins og stór rokksýning

Íslenska fyrirtækið Caoz kom að hönnun gervisins sem Stefán Karl Stefánsson notast við í leiksýningunni How the Grinch stole Christmas, eða Hvernig Trölli stal jólunum, eftir Dr. Seuss. Sýningin er nú sýnd fyrir fullu húsi í Baltimore. Sýningin hefur fengið frábæra dóma en leikarinn líkir umfanginu við stórt rokksjóv.

Gagnrýnendur hafa tekið Stefáni opnum örmum í stærstu dagblöðum Baltimore og lofsungið frammistöðu hans. Leikarinn var að sjálfsögðu himinlifandi með viðtökurnar. Segir ánægjulegt hversu vel Bandaríkjamenn hafi tekið „íslenskum" Trölla. „Þetta er auðvitað amerísk klassík og fólkið þekkir verkið mjög vel," segir Stefán.

Sýningin er ógnarstór að umfangi. Stefán segir að ferðast sé með hana í ellefu trukkum. Til að gefa gleggri mynd af stærðinni er bara starfsfólkið ferjað um í tveimur langferðabifreiðum. Áætlaður kostnaður við þennan „túr" er sagður vera fimm milljónir dollara. Miðað við gengi dollarans í dag eru það rúmar sjö hundruð milljónir íslenskra króna.

Sýningu lýkur í Baltimore í næstu viku og fer þaðan í eitt virtasta og stærsta leikhús Boston, Citi Performing Arts Center. Ferðalaginu lýkur síðan, vonandi, á Broadway snemma á næsta ári. Stefán segir þetta mikið puð. Hann sýni fjórtán til sextán sýningar á viku og það taki mikið á. „Þetta er eins og spila tvo fótboltaleiki á dag. Það er hins vegar hugsað vel um okkur. Maður er með sinn aðstoðarmann og síðan er sérstakur kokkur sem eldar ofan í okkur." - fgg