Búið er að loka falskri MySpace síðu Ingu Lindar

„Þetta breytir engu um mín áform," segir Inga Lind Karlsdóttir. MySpace síðu sem stofnuð var í nafni Ingu Lindar að henni forspurðri var lokað í gærkvöld. Inga Lind sagði í samtali við Vísi í gær að lögfræðingur hennar væri að skoða málið, og hún hyggðist kæra það til lögreglu. Enda margt af því sem skrifað var á síðuna var niðrandi fyrir hana og aðra sem þar birtust.

„Við vitum það að allt sem fer einu sinni á netið er komið til að vera. Það eru til afrit af þessari síðu," segir Inga Lind. Hún vill að málið verði fordæmisgefandi, enda fleiri en hún sem hafa lent  í sambærilegri stöðu.

„Ég vil fá úr því skorið hvort þetta sé ekki örugglega bannað. Mér líkar það ekki að menn hafi ætlað að nota nafnið mitt í annarlegum tilgangi, jafnvel þó þeir séu hættir við það. Glæpurinn er engu minni þó einhver segi fyrirgefðu og hætti við."