Mikill meirihluti stórkaupmanna vill taka upp evru

Tæplega sjötíu prósent félagsmanna í Félagi íslenskra stórkaupmanna eru hlynntir því að Íslendingar taki upp evru sem gjaldmiðil í stað krónunnar, samkvæmt skoðanakönnun sem Gallup gerði fyrir félagið.

Sextíu og sex prósent félagsmanna telja að aðild Íslands að Evrópusambandinu yrði hagstætt fyrir fyrirtæki þeirra. Þá segjast rúmlega 65 prósent stórkaupmanna hlynnt aðildarviðræðum að Evrópusambandinu og 57 prósent sögðust hlynnt aðild.

Knútur Sigmarsson framkvæmdastjóri félagsins segir í viðtali við Fréttablaðið að skilaboðin séu skýr, menn séu farnir að líta á krónuna sem nokkurskonar viðskiptahindrun.