Ekkja Bobby Fischer erfir 140 milljónir

Miyoko Watai, ekkja Bobby Fischer, mun erfa þær 140 milljónir sem Fischer skildi eftir sig við andlát sitt. Staðfest hefur verið að Watai var eiginkona Fischers en ekki unnusta eins og oft hefur verið haldið fram og mun því erfa þær rúmu 140 milljónir króna sem Vísir hefur heimildir fyrir að hann láti  eftir sig, auk 67 fermetra íbúðar í Espigerði.

Eins og kom fram í hádegisfréttum Stöðvar 2 er fyrrverandi mágur Fischer og faðir tveggja systrasona hans, Russel Targ, hér á landi til þess að gæta hagsmuna sona sinna. Haft er eftir honum á vef Morgunblaðsins að hann vilji ganga úr skugga um hvort Fischer hafi skilið eftir sig eiginkonu eða börn. Sé það raunin eigi hann ekkert erindi hér. Sé það hins vegar ekki raunin mun Targ væntanlega gera kröfu í eigur Fischer í nafni sona sinna enda þeir hans nánustu eftirlifandi ættingjar..

Fjármunirnir sem Fischer lætur eftir sig er hluti af verðlaunafé sem hann fékk fyrir hið umdeilda skákeingvígi sem hann háði við Boris Spassky í Sveti Stefan og Belgrad árið 1992 og olli því að hann lenti upp á kant við bandarísk stjórnvöld.

Því var lengi haldið föstu inn á svissneskum bankareikningum en samkvæmt heimildum Vísis rifti bankinn viðskiptum sínum við Fischer skömmu eftir að hann settist að hér á landi og lagði peningana inn á reikning í hans nafni í Landsbankanum.

Íbúðina í Espigerði keypti Fischer árið 2004. Hún er á níundu og efstu hæð í fjölbýli en náinn vinur hans, Garðar Sverrisson, býr á sjöundu hæðinni.

Því hefur lengi verið haldið fram að Fischer hafi feðrað stúlku á Filippseyjum en Vísir hefur ekki upplýsingar um að hann hafi verið í samskiptum við móður hennar síðan. Þar afleiðandi munu eigur Fischer renna óskipt til eiginkonu sinnar Miyoko Watai. Þau voru lengi nánir vinir og giftu sig þegar deilan um framsal hans frá Japan til Bandaríkjanna stóð sem hæst.