Kanna hvort Fischer hafi verið kvæntur

Hugmyndin um að Bobby Fischer yrði grafinn í þjóðargrafreit á Þingvöllum var borin undir ekkju hans, Miyko Watai. Hún hafnaði hins vegar hugmyndinni með þeim orðum að það hefði ekki verið vilji Fischers og valdi fremur útför í kyrrþei.

Fulltrúi ættingja Fischers í Bandaríkjunum er kominn til landsins og hefur ráðið sér lögfræðing til að fara yfir öll lagaatriði, meðal annars hvort Fischer hafi í raun verið kvæntur.

Ákvörðun um hvernig staðið var að útför Bobby Fischers í Laugardælum í gærmorgun var fyrst fremst tekin af Myoko Watai, sem tjáð hefur nánustu vinum sínum hérlendis að hafi verið gift Bobby Fischer og er fullyrt að hún hafi með sér vottorð sem sanni slíkt.

Samkvæmt upplýsingum Stöðvar 2 var hugmyndinni um opinbera útför á Þingvöllum borin undir hana en hún hafnaði henni alfarið, með þeim orðum að slíkt hefði Bobby ekki viljað heldur fremur viljað láta jarða sig utan Reykjavíkur.

Hugmyndin um Laugardæli var ekki sú eina sem kom til greina heldur var Stykkishólmur einnig í myndinni en Fischer hafði lýst þeirri ósk að flytja þangað.

Ættingjar Fischers frá Bandaríkjunum er komnir til landsins og hugðust annast útförina og réðu þess vegna íslenska lögfræðing í þjónustu sína, fyrst og fremst til að fara yfir lagaleg atriði. Þeir fréttu hins vegar ekki af athöfninni í Laugardælum fyrr en eftir á.

Þeir hafa nú beðið lögfræðinginn meðal annars um að kanna hvort rétt sé að Fischer hafi verið giftur, en það hefur grundvallarþýðingu fyrir erfðarétt. Eins er líklegt að skiptastjóri dánarbús vilji fá á hreint hvort Fischer hafi átt dóttur, sem þá væri aðalerfingi, að íslenskum lögum.