Stormsker gefst ekki upp fyrir afturhaldssömum framsóknarstrumpum

Sverrir Stormsker er óhress vegna þess að umdeilt viðtal hans við Guðna Ágústsson á Útvarpi Sögu var ekki endurspilaður í gær, eins og auglýst hafði verið. Greint var frá því í síðustu viku að Guðni hefði gengið á dyr í miðju viðtali við Sverri vegna ýmissa áleitinna spurninga. Sverrir segir á bloggsíðu sinni að Guðni hafi farið fram á það við Arnþrúði strax eftir viðtalið að þátturinn yrði ekki endurfluttur og að hann yrði rekinn.

„Ef að Guðni og litlu framsóknardindlarnir í kringum hann vilja meina að ég hafi orðið mér til skammar í þættinum en ekki Guðni sjálfur hversvegna er þeim þá svona mikið í mun að þátturinn verði ekki endurtekinn? Framsóknarmenn og aðrir stjórnmálamenn verða að fara að skilja að þeir eiga ekkert með að vera að grauta í frjálsum fjölmiðlum og reyna að hafa áhrif á hvað þar er sagt og gert. Læt meira heyra í mér síðar um þetta mál," skrifar Sverrir.

Hann lofar því að þátturinn verði kominn inná heimasíðu sína á mánudaginn: www.stormsker.net, hvað svo sem afturhaldssamir framsóknarstrumpar reyni að röfla í sér.