Ekki hætta á mengunarslysi

Fyrrverandi varðskipið Þór rak í vonskuveðri upp að landi í Hvalfirði í morgun. Óttast var að mikil olía væri um borð og að mengunarslys væri í uppsiglingu. Dráttarbátnum Magna tókst hins vegar að draga Þór af staðnum.

Þór er notaður í kvikmyndinni Reykjavik Whale Watching Massacre sem verið er að taka núna. Skipið er vélarvana. Undir hádegi var þar austan stormur, 23 metrar á sekúndu og fór vindhraðinn upp í 43 metra í hviðum.

Dráttarbáturinn Magni var sendur frá Reykjavík og menn frá Köfunarþjónustunni fóru á gúmmíbáti út í gamla Þór þar sem hann lá rétt austan við Hvammsey, til að undirbúa það að draga skipið út og gaf yfir bátinn. Þegar Magni kom á staðinn voru þeir komnir um borð og allt tilbúið fyrir aðgerðir. Eftir að taug hafði verið komið um borð í gamla Þór var hafist handa, en akkeri skipsins héldu við það og gerðu mönnum erfitt fyrir. Allt gekk þó að óskum.

Óttast var að olía væri í skipinu og að hætta væri á mengunarslysi.

Tökum í Hvalfirði vegna kvikmyndarinnar á að ljúka eftir 5 daga og útlitið er bjartara núna, en það var fyrr í dag.