Raunverulegur vilji til samninga skýrist á morgun

Kjaranefnd Ljósmæðrafélags Íslands hittir samninganefnd ríkisins í fyrsta sinn í þrjár vikur á fundi í fyrramálið. Guðlaug Einarsdóttir, formaður félagsins, segir að ljósmæður standi enn fast á sínum kröfum sem snúist aðallega um að fá menntun sína og störf metin að verðleikum í samræmi við aðrar stéttir í þjónustu hins opinbera með svipaða menntun.

„Við höfum þær væntingar að samninganefnd ríkisins hafi fengið þær fyrirskipanir frá sínum yfirmönnum sem þeir láta uppi í stjórnarsáttmálanum um að endurskoða beri kjör kvenna í þjónustu ríkisins," útskýrir Guðlaug og bætir við að raunverulegur vilji stjórnvalda til að koma til móts við ljósmæður skýrist væntanlega á morgun.

Af 24 stéttarfélögum innan BHM eru ljósmæður í sjöunda neðsta sætinu yfir launahæstu félögin þrátt fyrir að vera eitt af tveimur með mestu menntunarkröfurnar. Þessu vilja ljósmæður breyta.

„Við komum inn í þessar viðræður með opnum huga og við höfum bent á leiðir til þess að nálgast markmið okkar. Fyrst og fremst er þetta markmið réttlætismál því þessi skekkja er smánarblettur á jafnréttissamfélagi. Við verðum því að sýna yfirvöldum það traust að þeir hafi vilja til að jafna stöðu kvenna á við karla," segir Guðlaug að lokum.