Söfnuðu nærri 3200 undirskriftum gegn ferjulægi í Bakkafjöru

Kristján L. Möller samgönguráðherra tók í dag við tæplega 3200 undirskriftum manna sem mótmæla fyrirhugaðri byggingu ferjulægis í Bakkafjöru.

Hópur undir forystu Magnúsar Kristinssonar, útgerðarmanns í Vestmannaeyjum, stóð fyrir söfnuninni sem stóð yfir í viku á slóðinni www.strondumekki.is. Í tilkynningu frá aðstandenum undirskriftarsöfnunarinnar segir að tæplega 43 prósent Vestmannaeyinga, 18 ára og eldri, hafi skrifað undir mótmælin.

Í stað ferjulægis í Bakkafjöru vill hópurinn öflugri og hraðskreiðari Vestmannaeyjaferju sem siglir til Þorlákshafnar auk stórskipahafnar við Eiðið. Af þeim sem skrifuðu undir var tæpur helmingur búsettur í Eyjum, um 23 prósent brottfluttir og aðrir voru um 29 prósent.