Óskar vill viljayfirlýsingar REI upp á borðið

Óskar Bergsson, borgarfulltrúi Framsóknarflokksins vill að viljayfirlýsingar sem Reykjavík Energy Invest hefur undirritað síðustu daga verði kynntar í borgarráði. Hann segir nauðsynlegt að skýra frá innihaldi yfirlýsinganna, ekki síst í ljósi þess sem hann kallar misvísandi ummæli sjálfstæðismanna í málinu.

„Ég óskaði eftir því að þetta yrði lagt fyrir í borgarráði í dag en þeir vildu fá að kynna málið fyrir stjórn Orkuveitu Reykjavíkur á fundi á morgun," segir Óskar í samtali við Vísi. Að undanförnu hafa forsvarsmenn REI undirritað viljayfirlýsingar um framkvæmdir í Djíbútí, Jemen og Eþíópíuþ.

Óskar segist sérstaklega vilja skoða hvort einhverjir fyrirvarar séu í yfirlýsingunum um aðkomu annara aðila en REI að þessum samningum, „eins og gefið hefur verið í skyn," segir Óskar Bergsson.