Aldargömul hús verða jöfnuð við jörðu

Nokkrir Bílddælingar mótmæla harðlega þeirri ákvörðun Vesturbyggðar að láta rífa tvö hús. Annað var reist 1910 en hitt tíu árum fyrr. Húsin eru á svokölluðu flóðasvæði og er gert ráð fyrir því í snjóflóðavörnum að leiða hugsanleg flóð í farveg sem færi þar sem húsin standa.

Húsafriðunarnefnd var fengin til að meta húsin og taldi hún ekki ástæðu til að varðveita þau. „Við undrumst það að húsafriðunarnefnd skuli ekki telja ástæður til að vernda rúmlega 100 ára gömul hús,“ segir Jörundur Garðarsson sem á hús á flóðasvæðinu. „Er það vegna þess að við erum svo fá hérna sem höfum þau fyrir augunum?“

Í svarbréfi frá Bjarna Þór Einarssyni, byggingafulltrúa Vesturbyggðar, til Jörundar segir að húsin séu í mjög lélegu ástandi. „Við viljum að auglýst verði eftir fólki sem vill gera húsin upp,“ segir Jörundur. „Á þessu svæði eru öll húsin um aldargömul og við teljum mikilvægt að varðveita þá götumynd. Eins og allir vita leggja borgaryfirvöld mikið í það að varðveita sína 19. aldar götumynd þar sem því er fyrir komandi. Hver segir að það megi ekki líka gera í minni þorpum? Okkur sem erum aldir hér upp þykir þetta afar súrt í brotið.“

Ragnar Jörundsson bæjarstjóri segir að málið hafi fengið lokaafgreiðslu og verði hafist handa við að rífa húsin í byrjun þessa mánaðar. - jse