Gylfi Arnbjörnsson býður sig fram til forseta ASÍ

Gylfi Arnbjörnsson framkvæmdastjóri Alþýðusambands Íslands, hefur ákveðið að gefa kost á sér sem forseti sambandsins en kosið verður um embættið í október.

„Eftir að hafa leitað í baklandið og viðrað þessa hugmynd þá finnst mér ég fá það mikinn stuðning við hana að ég hef ákveðið að bjóða mig fram," segir Gylfi í samtali við Vísi.

Gylfi segist ekki búast við stórtækum breytingum á starfi ASÍ, nái hann kjöri. „Stefna samtakannna og starfið mótast mjög mikið af forystusveitinni, formönnum sambanda og stærstu félaga og miðstjórn ASÍ. Ég á því ekki von á því að það verði einhver stökkbreyting við þessi tíðindi því þetta hefur verið þéttur hópur sem hefur unnið saman undanfarin ár."

„En í daglegu starfi og samskiptum er auðvitað mannamunur á vinnulagi og auðvitað fylgir nýjum forseta, hver sem það nú verður, eitthvað nýtt og öðruvísi vinnulag," segir hann.

Að sögn Gylfa eru það efnahagsmálin og þær blikur sem nú eru á lofti í landinu sem eiga hug hans allan. „Við erum auðvitað á kafi í mjög umfangsmiklu verkefni sem að snýr að þessum efnahagsmálum og erum að reyna að finna leiðir út úr því. Það á því á hug manns þessi misserin að sinna því, bæði að finna leiðir til að komast út úr þessari stöðu en ekki síður að eiga samskipti við okkar bakland og viðra þær hugmyndir og fá viðbrögð við því hvað hægt sé að gera."

Gylfi segir að þetta sé stórt verkefni og mikilvægt „og ég býst nú við því að verða uppteknari af því heldur en þessu framboði á næstunni. Framboðið er síðan bara eitthvað sem ársfundur tekur afstöðu til þegar þar að kemur, þann 23 október," segir Gylfi Arnbjörnsson.