Móðir 13 ára fórnarlambs: Hann vissi vel hvað hún var gömul

Móðir 13 ára stúlku sem misnotuð var af 37 ára karlmanni á Eyrabakka um helgina segist niðurbrotin.

Dóttir hennar, sem er nýfermd, laumaðist út af heimili sínu seint á föstudagskvöldið og þáði ásamt vinkonu sinni boð mannsins um að þiggja áfengi og veitingar á heimili hans. Vinur mannsins og jafnaldri var einnig á staðnum.

Maðurinn veitti stúlkunum áfengi og bauð þeim í heita pottinn á heimili sínu. Seint um nóttina þegar stúlkan var orðin ofurölvi hafði hinn 37 ára gamli maður við hana samfarir.

Í samtali við Vísi fyrr í vikunni játaði maðurinn að hafa haft samræði við stúlkuna. En sagðist hins vegar ekki hafa vitað hve ung hún var.

„Hann átti alveg að vita hvað hún er gömul, enda var þessi maður bekkarbróðir mannsins míns," segir móðirin.

Hún hefur síðan um helgina verið að vinna úr þessu áfalli og reynt að veita dóttur sinni þá aðstoð sem hún þarf á að halda.

Í dag fór dóttirin í skólann í fyrsta skiptið síðan áfallið reið yfir um helgina.

„Við höfum fengið góða aðstoð hjá teyminu á Landspítalanum og félagsmálayfirvöldum á Selfossi. Þetta er allt mjög fært fólk sem hefur verið að aðstoða okkur og við erum þeim afar þakklát. Þau hafa staðið sig mjög vel," segir móðir stúlkunnar.

Hún segir að strax snemma á laugardaginn hafi hún fundið að ekki væri allt með felldu. Dóttir hennar fór smátt og smátt að segja henni frá því sem hafði gerst en það var ekki fyrr en um kvöldið að hún opnaði sig endanlega og sagði móður sinni frá því hvað hafði komið fyrir.

„Þetta er smátt og smátt að rifjast upp fyrir henni. Hún man eftir því að hann hafi verið að leita á hana. Hún reyndi að slá til hans og ná honum af sér. Hún var bara svo drukkin að hún gat það ekki," segir móðir hennar.

Hún segir að síðustu dagar hafi verið erfiðir en að vinkonur dóttur sinnar hafi stutt við hana.

„Ég á mér þá ósk heitasta að dóttir mín nái að vinna sig út úr því sem gerðist. Með hjálp fjölskyldunnar og annara sem eru reiðubúnir að aðstoða hana. Ég vona að þannig ná hún með einhverjum hætti að sætta sig við það sem hefur gerst. Ég veit að þetta hljómar sérkennilega. En við getum ekki breytt því sem orðið er. Eina leiðin til þess að sigrast á þessu er að horfast í augu við áfallið og vinna sig svo út úr því."

Hún segist einnig vonast til þess að maðurinn sem braut gegn dóttur sinni fái þungan dóm.

„Ég er reyndar þeirrar skoðunar að dómar í kynferðisbrotamálum eru of vægir á íslandi. En ég veit að þyngsti dómurinn sem þessi maður fær er hans eiginn mannorðsmissir. Hann verður aldrei litin sömu augum í þessum bæ."