Setur strik í kjaraviðræður ef vextir verða ekki lækkaðir á morgun

Framkvæmdastjóri Samtaka atvinnulífsins segir að það muni setja verulegt strik í kjaraviðræður ef Seðlabankinn hefur ekki vaxtalækkunarferli á morgun. Búist er við að á fundum þeirra með fulltrúum verkalýðshreyfingarinnar síðar í dag skýrist mjög hvort samningar takist á næstu sólarhringum.

Forystumenn Alþýðusambands Íslands undirbjuggu sig í morgun fyrir fundi síðar í dag með atvinnurekendum sem taldir eru geta ráðið úrslitum um hvort samningar takist á næstu dögum.

Kristján Gunnarsson, formaður Starfsgreinasambandsins, segir viðræður allar mjög brothættar og það megi voðalega lítið út af bregða til þess að upp úr slitni á milli samningsaðila. Þá eigi menn eftir að heyra í ríkisstjórninni um hvernig hún vilji nálgast samningana.

Hvorki verkalýðshreyfingin né Samtök atvinnulífsins munu undirrita samninga fyrr en séð er hvert útspil stjórnvalda verður, þar á meðal Seðlabankans.

Vilhjálmur Egilsson, framkvæmastjóri Samtaka atvinnulífsins, bendir á að það sé vaxtaákvörðunardagur á morgun og þá sjái menn hvaða sendingu þeir fái frá Seðlabankanum. „Það er mjög mikilvægt að vaxtalækkunarferlið sé hafið. Við höfum lagt áherslu á það að vextir eftir 18 mánuði verið komnir niður fyrir þrjú prósent mun milli okkar og evrusvæðisins," segir Vilhjálmur. Ef Seðlabankinn lækki ekki vexti, haldi þeim óbreyttum eða hækki þá setji það verulegt strik í það sem samningsaðilar séu að gera.

Bandalag starfsmanna ríkis og bæja sagði í gær að það væri ósvífin krafa að hið opinbera fylgdi sömu launastefnu og samið yrði um við þetta borð. Aðspurður hvort þessi yfirlýsing trufli viðræðurnar sem nú standa yfir segir Kristján Gunnarsson að forsvarsmenn verkalýðsfélaganna ætlist til þess að opinberu félögin tak á sig ábyrgð á stöðugleika. „En ég ætla ekki að semja kröfugerðina fyrir þá," segir Kristján.