Ingibjörg Sólrún gagnrýnir hagstjórn síðustu ríkisstjórnar

Ingibjörg Sólrún Gísladóttir, formaður Samfylkingarinnar, sagði við upphaf flokkstjórnarfundar á Selfossi í hádeginu að lausatök í hagstjórninni og fjáraustur úr ríkissjóði í aðdraganda kosninga setji nýrri ríkisstjórn miklar skorður við gerð fjárlaga fyrir næsta ár. Verulega sé dregið úr svigrúmi nýrra ráðherra til að koma þörfum umbótamálum hratt og vel í framkvæmd.

Ingibjörg segir að ráðherrar fyrri ríkisstjórnar hafi á lokavikum sínum við stjórnvölinn gert samninga og gefið út skuldbindandi loforð á ríkissjóð sem námu tugum milljörðum króna. Þessi loforð muni fylgja nýrri ríkisstjórn út kjörtímabilið og gott betur. Sagði Ingibjörg Sólrún það teljast í hæsta máta vafasamt að stjórnvöld sem hafi skilgreint umboð frá þjóðinni til að stjórna landinu í tiltekinn tíma taki ákvarðanir um fjárskuldbindingar ríkisins sem eigi að koma til framkvæmda löngu eftir að umboð þeirra til að stjórna landinu er runnið út.