Á fimmta tug erlendra ferðamanna meðal hinna látnu

Áttatíu og átta hið minnsta eru nú sagðir látnir eftir flugslysið á Phuket-eyju á Taílandi í morgun, þar af á fimmta tug erlendra ferðamanna. Alls voru 130 manns í vélinni sem var á vegum taílenska lággjaldaflugfélagsins One-Two-Go, 123 farþegar og sjö manna áhöfn.

Yfirvöld hafa nú staðfest að yfir helmingur farþega var útlendingar, eða 78 manns, meðal annars frá Bretlandi, Frakklandi, Canada og Ástralíu. Þau gáfu í dag út lista þar sem fram kom að um 30 þeirra hefðu komist af. Um fjörutíu manns voru fluttir á sjúkrahús eftir slysið en fimm þeirra munu vera alvarlega slasaðir, þar á meðal bresk kona sem er brunnin á 60 prósentum líkamans.

Þeir sem komust lífs af sögðu mikla skeflingu hafa gripið um sig eftir að vélin lenti á jörðinni, klofnaði í tvennt og það kviknaði í henni. Fólk hefði klöngrast hvert yfir annað í þeirri von að komast út áður en eldurinn næði til þess.

Flugmálayfirvöld segja að of snemmt sé að segja til um orsök slyssins en líklegt sé að slæmt veður á flugvellinum hafi haft áhrif. Flugstjórinn hafði reynt lendingu en hætti við á síðustu stundu. Þegar hann hugðist hífa vélina aftur upp skall hún í jörðinni.

Vélin var að koma frá Bangkok og hugðust margir farþeganna dvelja á Phuket-eyju sem er vinsæll ferðamannastaður hjá bæði Taílendingum og Vesturlandabúum.