Bræður setja svip sinn á Meistarann

„Þetta er skemmtiþáttur og menn verða að haga sér eftir því," segir Gísli Ásgeirsson, bróðir Páls Ásgeirs Ásgeirssonar sem sýndi vægast sagt stórskemmtileg tilþrif í síðasta Meistaraþætti. Páll Ásgeir lagði allt undir, sama hver staðan var og spennan var mögnuð í lokin þegar keppinautur hans, Svanborg Sigmarsdóttir, gat stolið sigrinum í síðustu spurningu eftir að Páll hafði leitt keppnina allan tímann. „Ég held að það toppi enginn þessa frammistöðu," bætir Gísli við.

Gísli verður sjálfur í Meistaranum á skírdag en sagðist ekki vita hvernig hann myndi haga sínum leik og taldi ótímabært að koma fram með einhverjar yfirlýsingar um hernaðartækni. „Aðrir hlutir eru mikilvægari um þessar mundir. Ég er ekki einu sinni búinn að ákveða í hverju ég á að vera en skjáþokki er jú mikilvægastur í þessu," bætir Gísli við.

Logi Bergmann Eiðsson, spyrillinn góðkunni, sagðist aldrei hafa orðið vitni að öðru eins. „Ég verð að segja að ég hlakka til að fá Gísla í þáttinn enda eru þeir bræður miklir húmoristar," segir Logi og bætir því við að hann hafi verið ánægður með framkomu Páls. „Það var svona sem við lögðum þáttinn upp, að menn tækju áhættu."

Páll Ásgeir var sjálfur hinn rólegasti og viðurkenndi að hann hefði lagt leik sinn svona upp. „Að taka allar áhættur sem í boði voru," segir Páll. „Mér skildist að þetta væri skemmtiþáttur og ákvað að leggja mitt á vogarskálarnar til að það gengi upp," bætir hann við. Páll undirbjó sig þó ekkert sérstaklega fyrir þáttinn heldur reyndi eftir fremsta megni að vera rólegur. „Stress getur byggt upp veggi fyrir minnið og ég reyndi að koma í veg fyrir það," útskýrir Páll sem taldi það ekki ákjósanlegt sjónvarpsefni ef þeir bræður myndu mætast. „Ég efast um að fólk myndi skilja húmorinn okkar."