Steingrímur J: Ólýðræðisleg vinnubrögð urðu Sjálfstæðisflokknum að falli

Steingrímur J. Sigfússon, formaður Vinstri grænna, fagnar nýju meirihlutasamstarfi í borginni. Hann segir Sjálfstæðisflokk hafa goldið fyrir ólýðræðisleg vinnubrögð og fyrir að hafa reynt að ganga yfir almenning.

„Þetta eru í fyrsta lagi mikil tíðindi og góð," sagði Steingrímur J. Sigfússon, formaður Vinstri grænna, í samtali við Vísi. „Ég fagna því að Orkuveita Reykjavíkur er komin úr greipum Sjálfstæðisflokksins."

Steingrímur þakkar borgarfulltrúum Vinstri grænna að meirihlutasamstarfið hafi sprunigð. „Það er barátta okkar fólks sem hefur stuðlað að þessu. Það er ennfremur ljóst að Sjálfstæðisflokkurinn er sundurtættur í borgarstjórn og ástandið þar með ólíkindum. Sjálfstæðisflokkurinn hefur goldið fyrir það að beita ólýðræðislegum vinnubrögðum og reynt þannig að ganga yfir hagsmuni almennings."