Sjálfstæðismenn hneykslaðir á vinnubrögðum Björns Inga

Sjálfstæðismenn eru furðu slegnir og hneykslaðir yfir vinnubrögðum Björns Inga Hrafnssonar, oddvita Framsóknarflokksins, að sögn Jóns Kristins Snæhólms, aðstoðarmanns borgarstjóra. Hann segir ákvörðun Björns Inga um að slíta meirihlutasamstarfinu hafa komið sjálfstæðismönnum í opna skjöldu.

„Menn eru furðu lostnir yfir þessum vinnubrögðum og hneykslaðir," sagði Jón Kristinn Snæhólm, aðstoðarmaður Vilhjálms Þ. Vilhjálmssonar borgarstjóra, í samtali við Vísi. „Að slíta samstarfi útaf ágreiningi um tímasetningu á sölu hlutabréfa eru ný tíðindi í íslenskri pólitík."

Að sögn Jóns Kristins ræddust Björn Ingi og Vilhjálmur saman um klukkan hálf ellefu í gærkvöldi. Komust þeir þá að sameiginlegri niðurstöðu um að samstarf flokkanna í borgarstjórn myndi þola ágreininginn varðandi REI.

Jón segir að Björn og Vilhjálmur hafi í kjölfarið ákveðið að hittast aftur á heimili borgarstjóra klukkan ellefu í morgun. Björn hafi hins vegar ekki mætt á þann fund. Þá hafi Björn átt að mæta á fyrirfram ákveðinn fund meirihlutans í Höfða en þar lét hann heldur ekki sjá sig. Þrátt fyrir ítrekaðar tilraunir hafi ekki náðst í Björn Inga fyrr en klukkan tvö í dag. Að sögn Jóns óskaði Björn þá eftir að funda með borgarstjóra. Á heimili borgarstjóra í Breiðholti hafi Björn svo tilkynnt Vilhjálmi að hann ætlaði sér að slíta samstarfinu.

Jón segir klárt að Björn hafi kosið að fara í viðræður við minnihlutann þrátt fyrir það samkomulag sem hann gerði við borgarstjóra í gær. „Þetta er afskaplega sorglegt," sagði Jón.

Að sögn Jóns ætlar borgarstjóri að boða til blaðamannfundar á heimili sínu seinna í dag. Hann segir að Vilhjálmur muni áfram starfa í borgarstjórn sem oddviti Sjálfstæðisflokksins.