1650 manns bíða eftir félagslegu húsnæði

1650 manns bíða eftir félagslegu leiguhúsnæði hjá sveitarfélögunum og Öryrkjabandalaginu samkvæmt skýrslu sem Rannsóknarstöð þjóðmála við félagsvísindanefnd Háskóla Íslands vann fyrir nefnd á vegum félagsmálaráðherra.

Nefndinni var ætlað að skila tillögum til að efla félagslegan þátt húsnæðislánakerfisins, þar með talinn leigumarkaðinn og lánveitingar til fólks undir skilgreindum eigna- og tekjumörkum.

Um 70 prósent þeirra sem bíða eftir húsnæði eru með heildartekjur undir 150 þúsund krónum á mánuði og flestir eru einhleypir og barnlausir en einstæðir foreldrar eru um 30 prósent. Yfir 700 börn eru á framfæri þeirra sem eru á biðlistunum.

Þá sýnir símakönnunn sem gerð var í tengslum við rannsóknina að meirihluti Íslendinga býr við góðar húsnæðisaðstæður og viðunandi greiðslubyrði. Í könnunni kemur fram að sterkar vísbendingar eru um að erfitt sé fyrir ungar barnafjölskyldur að koma inn á fasteignamarkaðinn og fólk með tekjur undir meðaltekjum. Því lægri sem tekjurnar eru þeim mun erfiðara er það. Einstæðir foreldrar eru í sérstaklega erfiðri stöðu á húsnæðismarkaði.

Ef úrtakið er yfirfært á landsmenn alla hafa um sjö þúsund manns reynt að kaupa húsnæði á síðastliðnum árum en fallið frá því. Þetta er mun algengara á höfuðborgarsvæðinu en á landsbyggðinni. Af þeim sem vilja kaupa en geta ekki er skortur á eigin fé stærsta hindrunin.

Um 30.000 landsmanna á aldrinum 18-80 ára sem ekki búa í eigin húsnæði telja að erfitt verði fyrir þá að greiða afborganir og vexti af húsnæðislánum miðað við núverandi tekjur sínar.