Lítið atvinnuleysi í september

Skráð atvinnuleysi í septembermánuði var 0,8 prósent samkvæmt samantekt Vinnumálastofnunar. Að meðaltali voru um 1.336 manns án atvinnu í síðasta mánuði og fækkaði um 140 frá ágúst. Fleiri konur voru án atvinnu en karlar.

Atvinnuleysi var minnst á höfuðborgarsvæðinu eða 0,7 prósent en var 0,8 prósent í ágúst. Á landsbyggðinni jókst atvinnuleysi lítillega og mældist 1 prósent.

Atvinnuleysi meðal kvenna minnkaði úr 1,2 prósentum í 1,1 á meðan atvinnuleysi meðal karla stendur í stað milli mánaða og mældist 0,6 prósent.

Fram kemur í frétt Vinnumálastofnunar að reiknað er með því að atvinnuleysi aukist lítið eitt á næstunni í takt við hefðbundna árstíðasveiflu í atvinnulífinu. Því er gert ráð fyrir að atvinnuleysi verði 0,9 til 1,2 prósent í októbermánuði.