Kannast ekki við að meirihlutinn sé að springa

Gísli Marteinn Baldursson, borgarfulltrúi Sjálfstæðisflokksins, segist ekki vita til þess að meirihluti sjálfstæðismanna og framsóknarmanna í borgarstjórn sé að springa. Gísli kom til fundar meirihlutans í Höfða sem átti að hefjast klukkan eitt en eftir því sem fréttastofa kemst næst er Björn Ingi Hrafnsson, borgarfulltrúi Framsóknarmanna ekki mættur.

Gísli Marteinn sagði í hádegisfréttum Stöðvar tvö að meginmarkmið fundarins væri að ræða fjárhagsáætlun borgarinnar fyrir næsta ár. „Við leysum þetta REI-mál finnst mér alveg augljóst ef menn hafa áhuga á að gera það. Ég talaði við Björn Inga í gær oft og það er mjög mikill vilji til þess að halda þessu meirihlutasamstarfi áfram og engir brestir komnir í það í sjálfu sér og enginn talað við neina aðra eða slíkt, segir Gísli Marteinn og segir þá umræðu fara meira fram í fjölmiðlum ef hann hafi lesið stöðuna rétt.

Hann segir mikilvægt að komast aftur í það að stjórna borginni. „Þetta mál (REI-málið), það var illa til þess stofnað í upphafi og ég vil að við leysum það og komum okkur út úr þessu. Mér sýnist menn hafa reynt að laga það sem aflaga fór í þessu. Við sem lýstum andstöðu við það sem gert var göngum sátt frá borði núna og ég held að það sé mikilvægt að við snúum okkur að því að starfa fyrir borgarbúa," segir Gísli Marteinn.

Aðspurður um ágreininginn um það hvenær selja eigi hlutinn í REI segir Gísli Marteinn að ef það sé stóri ágreiningurinn sé meirihlutinn til að leysa það. Hvorki hann né Björn Ingi séu menn til að meta hvenær selja eigi hlutabréf heldur eigi það að vera í höndum sérfræðinga. „Það er enginn ágreiningur um það að við eigum að selja þetta, við eigum að fara út úr þessu, og hvort við gerum það einhverjum mánuðum fyrr eða síðar það held ég að sé ekki stóra málið í þessu."

Gísli telur að niðurstaðan verði sú að fara í söluferlið og svo verði næstu skref ákveðin þar á eftir, það er hvenær eigi að selja. Aðspurður hvort meirihlutinn sé ekki að springa sagði Gísli:„ Ekki svo ég viti, það væru þá fréttir fyrir mig."

Skömmu fyrir klukkan tvö kom svo Vilhjálmur Vilhjálmsson borgarstjóri af fundinum. Hann vildi ekki ræða við fjölmiðlamenn en sagðist myndu koma aftur innan skamms.