Skortur á starfsfólki hjá 60 prósentum fyrirtækja

Nærri sextíu prósent fyrirtækja segja að skortur sé á starfsfólki samkvæmt könnun sem Capacent Gallup gerði í samstarfi við fjármálaráðuneytið, Seðlabankann og Samtök atvinnulífsins.

Samkvæmt könnuninni telja 58 prósent forsvarsmanna fyrirtækja að skortur sé á starfsfólki í fyrirtækjum sínum en þetta hlutfall var 51 prósent í síðustu könnun sem gerð var í maí.

Fram kemur í vefriti fjármálaráðuneytisins að mestur skortur sér á starfsfólki í sérhæfðri þjónustu, verslun og samgöngum, flutningum og ferðaþjónustu. Viðsnúningur hefur orðið hjá fyrirtækjum í fjármála- og tryggingastarfsemi en skorturinn hjá þeim hefur minnkað úr 71 prósenti í 33 prósent frá síðustu könnun. Þá leiðir könnunin í ljós að mun fleiri fyrirtæki telji nú að starfsmönnum muni fækka á næsta hálfa árinu.

Könnun Gallup sýnir enn fremur að aðeins 4,2 prósent telja aðstæður í efnahagslífinu slæmar og eru það einkum fyrirtæki í sjávarútvegi sem telja ástandið slæmt. Bjartsýni um horfur í efnahagslífinu á næstu sex mánuðum virðist hins vegar hafa minnkað en áfram telja þó flestir að ástandið muni verða óbreytt, eða um 62 prósent svarenda.

Könnunin var gerð á tímabilinu 24. ágúst til 16. september og svarhlutfall var um 63 prósent. Alls tók 231 fyrirtæki þátt í könnuninni að þessu sinni en í endanlegu úrtaki voru 369 fyrirtæki.