Aftur ákært í netbankamáli

Mál gegn fjórum Akureyringum sem samanlagt högnuðust um ríflega 30 milljónir króna í gjaldeyrisviðskiptum á Netinu var þingfest í gær - aftur.

Þetta er í annað skipti sem ákært er í málinu fyrir Héraðsdómi Norðurlands eystra en áður hafði Hæstiréttur vísað málinu frá vegna formgalla þar sem rangur aðili gaf út ákæruna.

Nú ákærir Ríkislögreglustjóri alls fjóra aðila, þar af einn karl sem hagnaðist um rúmar 24 milljónir króna þegar hann í 3.098 færslum „misnotaði aðgang sinn að gjaldeyrisviðskiptakerfi í Netbanka hlutafélagsins Glitnis með því að nýta sér með kerfisbundnum og sviksamlegum hætti kerfisvillu í gjaldeyrisviðskiptakerfinu," eins og segir í ákæru.

Mistök starfsmanns urðu til þess að kaup-og sölugengi víxlaðist og var þannig hægt að hagnast svo gríðarlega með kaupum og sölu á dollurum og evrum. Tveir aðrir karlar og ein kona eru einnig ákærð en þeirra hlutur er frá 350 þúsund krónum upp í rúmar 3 milljónir.