Árangur á alþjóðlegum orkumarkaði ekki gefinn

Sameinað fyrirtæki Reykjavík Energy Invest og Geysir Green Energy býr að sérþekkingu Íslendinga á sviði jarðvarma og endurnýtanlegrar orku. Það þýði þó ekki að árangur í sölu á alþjóðlegum markaði sé gefinn. Þetta segir bandarískur sérfræðingur um samkeppni á alþjóðlegum orkumarkaði.

Kenneth P. Morse er framkvæmdastjóri frumkvöðlaseturs MIT-háskóla í Bandaríkjunum og sérfróður um alþjóðlegum orkumarkaði. Hann kom hingað til lands vegna ráðstefnu Innovit, nýsköpunar og frukvöðlaseturs, og til að skrifa undir samning um frumkvöðlakeppni íslenskra háskólanema sem verður haldin að fyrirmynd sams konar keppni við MIT.

Kenneth P. Morse segir allt sem tengist endurnýjanlegir orku vekja áhuga í dag og vinsældir málaflokksins miklar. Mörg hundruð prófessorar og nemendur helgi sig þessu málaflokki í MIT. Þar sé hægt að sitja rúmlega tuttugu námskeið tengd orkumálum á hverri önn - þar á meðal vinsælt námskeið um hvernig skuli stofna og reka fyrirtæki í þessum geira. Fyrir þennan vetur hafi 85 nemendur sóttst eftir fimmtán lausum plássum í því námi.

Hann segir vel þekkt að Íslendingar hafi lengi nýtt jarðvarma og hafi mikla þekkingu á þessum geira. Margir eigi því eftir að koma hingað á næstu misserum til að reyna að læra allt sem Íslendingar viti fyrir ekki neitt.

Morse óskar nýju sameinuðu fyrirtæki Reykjavík Energy Invest og Geysir Green Energy velfarnaðar en segir langt þar til markaður með endurnýjanlega orku þróist og samkeppnin á honum sé nú og verði áfram mjög mikil. Það sem ráði úrslitum fyrir REI verði sölumennska - það sé eitt að hafa mikla þekkingu á þessu sviði en annað að selja hana.