Orkulindir áfram í samfélagslegri forsjá

Orkulindir á Íslandi eiga áfram að vera í samfélagslegri forsjá að mati Össurar Skarphéðinssonar, iðnaðarráðherra. Þetta kom fram í máli ráðherra á Alþingi í dag. Hann segir að það frumvarp sem nú er í smíðum komi reglu á orkumarkaðinn og tryggi að þær orkulindir sem í dag eru í samfélagslegri forsjá verði það áfram.

Frumvarpið mun að sögn ráðherra leggja áherslu á þrjá þætti. Í fyrsta lagi að skilja á milli samkeppnisreksturs í orkumálum og sérleyfisþáttar. Í öðru lagi að dreifing og fráveitur verði áfram að meirihluta í félagslegri eigu og í þriðja lagi að orkulindir sem í dag eru í samfélagslegri forsjá verði það áfram.