Dómsmálaráðherra gagnrýnir forstjóra REI

Björn Bjarnason, dóms- og kirkjumálaráðherra, tekur undir gagnrýni borgarstjórnarflokks sjálfstæðismanna á Guðmund Þóroddson, forstjóra Reykjavík Energy Invest. Á heimasíðu sinni segir ráðherra að það komi sér ekki á óvart að Guðmundur sé tregur til að miðla upplýsingum til kjörinna fulltrúa.

Borgarfulltrúar Sjálfstæðisflokks hafa gagnrýnt lykilstarfsmenn Reykjavík Energy Invest að undanförnu. Á blaðamannfundi á mánudaginn voru þeir meðal annars sagðir hafa brugðist í því að koma upplýsingum á framfæri til borgarfulltrúa. Var talað um trúnaðarbrest í því samhengi.

Björn Bjarnason, dóms- og kirkjumálaráðherra, segir á heimasíðu sinni að það komi sér ekki á óvart að Guðmundur Þóroddson, forstjóri REI, sé tregur til að miðla upplýsingum til borgarfulltrúa:

„Ég ítreka: Ekkert af því, sem sagt hefur verið um tregðu Guðmundar Þóroddsonar til að miðla upplýsingum til kjörinna fulltrúa og jafnvel stjórnarmanna, kemur mér á óvart. Þar tala ég af eigin reynslu. Nærtækt er að rifja upp baráttuna fyrir því að fá að vita, hvað orkuveituhúsið varð miklu dýrara en áætlað var - nýjasta talan, sem nefnd hefur verið, er 4 milljarðar króna umfram áætlun."

Sjá nánar á heimasíðu Björns Bjarnasonar.