Rannsókn lokið í skærastungumálinu

Lögreglan á höfuðborgarsvæðinu hefur lokið rannsókn á árásinni sem átti sér stað aðfaranótt miðvikudags þegar karlmaður var stunginn í bakið með skærum. Þrír voru handteknir vegna málsins.

Samkvæmt upplýsingum frá lögreglunni á höfuðborgarsvæðinu var fólkinu sleppt eftir yfirheyrslur í gær og telst rannsókn málsins lokið. Málinu hefur nú verið vísað til saksóknara sem mun ákveða hvort gefin verði út ákæra.

Árásin átti sér stað í fjölbýlishúsi í vesturbæ Reykjavíkur skömmu eftir miðnætti í gær. Kona á fimmtugsaldri stakk karlmann á sextugsaldri í bakið með skærum. Maðurinn náði að forða sér yfir í næsta stigagang og kalla á hjálp. Hann var fluttur á slysadeild og reyndist skurðurinn fjögurra sentímetra langur en ekki hættulega djúpur. Konan, og tveir aðrir karlmenn sem einnig voru í íbúðinni, voru handtekin.

Fólkið hefur allt komið áður við sögu lögreglunnar.