Erlend glæpagengi ræna verslanir hér á landi

Erlend glæpagengi ræna íslenskar verslanir með skipulögðum hætti segir formaður Samtaka verslunar og þjónustu. Útlendir þjófar eru stórtækari en Íslendingar, sem stela hins vegar mun oftar en útlendingar. Öryggisfræðingur náði að stela fyrir hundrað þúsund krónur úr fimm búðum á hálftíma.

Fjórtán Litháar voru handteknir í gær vegna gruns um umfangsmikinn búðarþjófnað í verslunum á höfuðborgarsvæðinu. Mikið magn af dýrum útivistarfatnaði, tölvum, tölvubúnaði og snyrtivörum fannst á heimilum þeirra. Mennirnir hugðust selja þýfið og senda til Litháens. Lögreglan stöðvaði póstsendingu þangað fyrir skömmu. Níu þeirra voru úrskurðaðir í viku gæsluvarðhald og fjórir í farbann. Samtök verslunar og þjónustu ákváðu að bregðast við þessum fréttum í dag.

Sigurður Jónsson formaður Samtaka verslunar og þjónustu segir að erlendar glæpaklíkur stundi það að stela úr verslunum hér á landi.

Frá árinu 2005 hefur orðið 70% aukning á þjófnuðum þar sem útlendingar eiga í hlut. Tölur frá samtökunum sýna að 20% allra þjófa séu útlendingar en þeir steli fyrir hærri upphæðir. Áætlað er að meðalþjófnaður Íslendinga sé um 2500 krónur á mann en útlendinga rúmlega 30.000 krónur. Samtökin hvetja verslunarmenn til að herða eftirlit.

Eyþór Víðisson öryggisfræðingur starfar fyrir verslanir og segir margar glufur í öryggiskerfum þeirra. Í vettvangsferð sinni náði hann að stela fyrir hundrað þúsund krónur úr fimm búðum í verslunarmiðstöð á höfuðborgarsvæðinu á hálftima. Eyþór segir árvökult starfsfólk bestu forvörnina gegn þjófnuðum og brýnt sé að það fái rétta þjálfun til að taka á þeim málum.