Brjóta þjófavarnir af varningi og stela

Svo virðist sem Litháarnir, sem eru í haldi lögreglunnar á höfuðborgarsvæðinu vegna gruns um stórfelldan þjófnað í verslunum hér á landi, brjóti í einhverjum tilvikum þjófavörn af varningi og komi honum þannig út úr verslunum.

Meðal þeirra fyrirtækja sem urðu fyrir barðinu á þjófagenginu var 66 gráður norður, en í fréttum í gær mátti sjá fjölmargar flíkur frá fyrirtækinu á meðal varnings sem lögregla gerði upptækan í húsleit í gær.

Aðspurð hvernig mennirnir hafi komist út með vörurnar segir Kristín að svo virðist sem þeir brjóti þjófavarnir af flíkunum. „Við höfun fundið brotnar þjófavarnir í mátunarklefum," segir hún.

Kristín segir enn fremur að í kjölfar þessa máls verði farið yfir þjófavarnir í verslununum og hugsanlega leitað nýrra leiða. Þarna hafi verið atvinnuþjófar á ferð eins og fram hafi komið hjá lögreglunni.

Stöðvuðu póstsendingar til Litháens

Eins og fram hefur komið hafa 14 Litháar verið handteknir vegna þjófnaðanna sm ná til ýmissa verslana á höfuðborgarsvæðinu. Hafa sjö þeirra þegar verið úrskurðaðir í gæsluvarðhald í viku. Grunur leikur á þeir hafi ætlað að senda þýfið til Litháens.

Ómar Smári Ármannsson, yfirmaður auðgunarbrota hjá lögreglunni á höfuðborgarsvæðinu, segir að lögreglan hafi stöðvað póstsendingar sem áttu að fara til Litháens og lögreglan þar í landi rannsaki nú hverjir standi fyrir sölu þýfisins þar.

Ómar segir ekki vitað hvort mennirnir séu löglegir í landinu en ljóst sé að þeir hafi ekki stundað reglubundna vinnu. Sumir þeirra hafi komið við sögu lögreglu bæði erlendis og hér á landi.