Keflavíkurflugvöllur undir samgönguráðuneyti fyrir áramót

Varnarmál Íslands eiga heima í utanríkisráðuneytinu að mati utanríkisráðherra sem kynnti verkefni ráðuneytisins í utanríkismálanefnd í gær. Keflavíkurflugvöllur verður færður undan utanríkisráðuneytinu til samgönguráðuneytisins fyrir áramót.

Ingibjörg Sólrún Gísladóttir utanríkisráðherra kynnti helstu verkefni ráðuneytisins á komandi vetri í utanríkismálanefnd Alþingis í gær. Hún segir að unnið sé að því að flytja Keflavíkurflugvöll frá ráðuneyti hennar til samgönguráðuneytisins, þar sem hann eigi heima sem samgöngumannvirki og það muni væntanlega gerast fyrir áramót.

Varnarmál eru í fyrsta skipti liður í fjárlagafrumvarpi á Íslandi en á næsta ári er áætlað að eyða 534 milljónum í þann lið. Þar með er ekki öll sagan sögð því Íslendingar hafa einnig tekið yfir ratsjárkerfi Bandaríkjahers og sá liður kostar 822 milljónir. Heildarframlög til varnarmála eru því beint og óbeint um 1,3 milljarðar króna. Áhöld hafa verið um í hvaða ráðuneyti varnarmálin eigi heima. Ingibjörg Sólrún telur að þau eigi heima í utanríkisráðuneytinu.

Utanríkisráðherra segir þó að ákveðnir angar öryggismála þjóðarinnar heyri undir dómsmálaráðuneytið, með almennri löggæslu og landhelgisgæslu.