Á þriðja áratug að borga upp þorskkvóta

Verð á varanlegum þorskkvóta hefur hækkað um 160 prósent frá því í fyrrasumar. Það tekur kaupendur vel á þriðja áratug að láta slík kaup borga sig.

Nú er það litla sem boðið er af varanlegum þorskveiðiheimildum verðlagt á 4.200 krónur kílóið sem er hækkun úr rúmum 1.500 krónum fyrir rúmu ári.

Ef farið er hálft annað ár aftur í tímann kostaði kílóið 1.100 til 1.200 krónur en er nú komið í 4.200 krónur sem fyrr sagði. Ef við gefum okkur að útgerðin fái 250 krónur á ári fyrir kílóið tekur 16 til 17 ár að vinna það upp.

Þá er ekki tekið tilllit til vaxta af láni til kvótakaupa en ef það er gert vinnur aflaverðmætið ekki fyrir vöxtum. Þá er líka á það að líta að hrein arðsemi af þorskkílói sem útgerðarmaðurinn selur á 250 krónur á markaði er aðeins 80 til 90 krónur og það er í rauninni sú tala en ekki 250 krónurnar sem á að vinna upp í kaupin.

Viðmælendur fréttastofunnar segja að þetta sé mun meiri hækkun en búist var við og menn geti ekki keypt heimildir svona háu verði nema í algjörum vandræðum til að eiga kvóta fyrir þeim þorski sem óhjákvæmilega kemur með öðrum afla.