Rýmka ráðningarreglur eldri borgara vegna manneklu

Samþykkt var í borgarráði í dag tillaga borgarstjóra um að Reykjavíkurborg verði heimilt að ráða 70 ára og eldri til starfa í minnst þriðjungs starfshlutfall í eitt ár í senn. Þetta kemur fram í tilkynningu frá borginni.

Með þessu vilja borgaryfirvöld meðal annars reyna að ráða bót á manneklu í ummönunarstörfum á vegum borgarinnar, en eins og fram hefur komið vantar um 150 starfsmenn á leikskóla borgarinnar og þá vantar sömuleiðist töluverðan fjölda á frístundaheimilin. Skilyrði fyrir ráðningu er að í hvert sinn liggi fyrir svokallað starfshæfnisvottorð til staðfestingar á hæfni viðkomandi til starfa.

Heimildin nær hins vegar ekki til lífeyrisþega sem þiggja lífeyri úr B-deild Lífeyrissjóðs starfsmanna ríkisins eða Lífeyrissjóði hjúkrunarfræðinga enda er það óheimilt samkvæmt reglum þessara sjóða eftir því sem segir í tilkynningu borgarinnar.

Samkvæmt eldri reglum borgarinnar var yfirmanni heimilt að endurráða starfsmenn eldri en 70 ára eftir að þeir höfðu látið af föstu starfi innan Reykjavíkurborgar í annað eða sama starf í lægra en helmings starfshlutfall án skerðingar lífeyris. Slík endurráðning gilti til 72 ára aldurs. Því er hér um rýmkun á réttindum eldri starfsmanna til vinnu hjá Reykjavíkurborg.

Ráðinn hefur verið verkefnisstjóri úr röðum eldri borgara til þess að finna eldri borgara sem hafa áhuga á lausum störfum innan leikskóla, grunnskóla, frístundaheimila og heimaþjónustu borgarinnar. Farið verður yfir starfslýsingar og starfsaðstæður á áðurnefndum vinnustöðum með hag eldri borgara í huga.