Frelsi til sölu á áfengi aftur rætt á þingi

Fyrsta mál á þingfundi alþingis sem hefst kl. 15.00 í dag er frumvarp til laga um afnám einokunnar ÁTVR á sölu á léttu áfengi. Frumvarp um frelsi til sölu á léttu áfengi og bjór hefur verið lagt fram á fjórum síðustu þingum en aldrei hlotið afgreiðslu.

Flutningsmenn frumvarpsins nú eru þingmennirnir Sigurður Kári Kristjánsson, Ágúst Ólafur Ágústsson og Birgir Ármannsson. Auk þeirra skrifa 17 aðrir þingmenn sig sem meðflutningsmenn.

Í greinargerð með frumvarpinu segir að lagt sé til að einkasala ÁTVR á áfengi sem sé með vínandastyrk undir 22% verði gefin frjáls. Tekið er fram að erfitt sé að finna rök fyrir tilvist ÁTVR en fjölmörg gegn henni. Þá er jafnframt bent á að á nokkrum stöðum á landinu sjái einkaaðilar um sölu áfengis með sérstöku samkomulagi við ÁTVR.