Velti jepplingi sínum á Hellisheiði

Töluvert hefur verið um umferðarslys og árekstra á Suðurlandsvegi í morgun. Rétt fyrir klukkan átta í morgun missti erlendur ferðamaður stjórn á jepplingi sínum uppi á Hellisheiði og fór hann margar veltur utan vegar. Einn farþegi var í bílnum og telur lögreglan á Selfossi mikla mildi að bæði ökumaður og farþegi hafi sloppið með minni háttar meiðsl en þeir voru fluttir með sjúkrabíl á slysadeild í Fossvogi. Bíllinn er hins vegar gjörónýtur.

Fyrr um morguninn, eða upp úr klukkan hálfátta, varð önnur velta en í þetta sinn í Draugahlíðabrekku skammt frá Litlu-Kaffistofunni. Ökumaður og farþegi úr bílnum voru flutt á slysadeild í Fossvogi en voru ekki talin mikið slasaðir. Bifreiðin var hins vegar ónýt. Í beinu framhaldi af því slysi rákust fjórir bílar saman en þar slasaðist enginn en ökutækin eru öll mikið skemmd og óökufær.

Á þeim stað sem síðarnefndu óhöppin urðu skiptist vegurinn í tvær akreinar til austurs og eina í vestur með girðingu á milli. Óhöppin urðu á veginum þar sem ekið er í vestur og segir lögregla að þar sé nær engin vegöxl. Þess vegna hafi vegurinn lokast um tíma og nokkrar umferðartafir orðið.

Lögregla á Selfossi segir í tilkynningu að mikla hálku hafi gert skyndilega á Suðurlandsvegi í morgun og að rekja megi slysin til þess.